طريقه عمل الحمام المحشي رز

من اجمل أكلات الجدات
من اكلاتنا المصرية التقليدية
الحمام المحشي رز بكل تفاصيله
ولو بتحبيه محشي فريك
نفس الطريقة ولكن سوي الفريك 3 أرباع سوا
وزودي السمنه علشان يفلفل

المكونات

عدد من الحمام حسب رغبتك متنظف وجاهز للحشو
لكل حمامه ملئ كف اليد وهي مقفوله رز
بمعني اكبشي كميه من الرز وصوابعك جنب بعضها قليلا وكفك مفتوحه لحد ما
والي يتبقى في ايدك يكون مناسب جدا للحمامايه
لكل اربع حمامات بصله كبيره او اتنين وسط
مقدار من السمنه مناسب لكمية الرز ويزيد عن الرز العادي
التوابل للحشو
فلفل اسود بهار لحم قليل من الجنزبيل البودر ملح وممكن نعناع لمن يرغب











لسلق الحمام
حبهان مكسر ومدقوق لاورا بهار لحم مستكه فلفل اسود ملح
الطريقه

عايري الرز بكوبايه واغسليه وانقعيه حوالي ربع ساعه
في اناء واسع ضعي نصف كوب ميه لكل 2 كوب رز
وضيفي قليل من الملح وبهار اللحم والفلفل الاسود
سخني الميه كويس وتصل لحد الغليان

ضيفي الرز وقلبيه كويس وهدى النار جدا
دقيقه واطفي النار واتركي الرز محكم الغطاء
ضيفي ملعقتين سمنه كبار لكي يفلفل وتتفرط حباته
وارفعيه من على النار تماما حتى لا يلتصق بقاع الاناء
جهزي خلطة الحشو
خرطي البصل افضل وضيفي له فلفل اسود وملح وخلي بالك انك ضفتى ملح للرز
ادعكي البصل والملح والفلفل بايدك وضيفي بهار اللحم
وكلما كان البهار ظاهر في الحشوه كلما كان الحمام ريحته رائعه وجميل
ضعى الرز في اناء واسع مناسب للكميه وضيفي خليط البصل
ظبطي الملح وضيفي سمنه تانى واعملي حساب كمية السمنه الي اضفتيها مسبقا
يجب ان يكون الرز مفلفل والسمنه ظاهره فيه

امسكي الحمام وشدى راس الحمام حتى تتفتح الرقبة وهتسمعي لها صوت طقطقه
لسهولة ادخال الراس جوه الرقبه
واحشيها بين الجلد واللحم فقط
لا داعي لحشو الحمام من الداخل (البطن) مطلقا

اتركي مساحه كافيه لسوى الرز حتى لا تنفجر الحمامه
دخلي راس الحمامه جوه الرقبه بحرص وذلك لعدم خروج الرز
كتفي الحمامه بوضع جناحيها على ظهرها وقلبهما لجهة الراس
ووضع الرجلين في اسفلها وافردي الرز داخل الحمامه بيدك
وزعيه تحت الجلد بالطول لتكتسب شكل طويل بعد السوا




انزلي بالحمام في ماء بيغلي مضاف له توابل الحشوه
واول الحمام ما يغلي هدي النار بحيث يغلي بهدوء (ينمل)
واتركيه ساعه بالظبط
خرجيه بالراحه جدا لانه ممكن ينفجر بسهوله
اتركيه يبرد قليلا واكسري الجزء الظاهر من الرجلين
واكسري الجزء التالت من الجناح لتعطي شكل جميل للحمامه
ولانعدام اللحم بهما
ادهني الحمام بعصير ليمون بحيث تصل لجسم الحمامه كله
حمريه في زيت سخن جدا وغزير ويكون لونه دهبي ويشهي
قدمي الحمام سخن على فرشة بقدونس
قدمي معاه رز حمام بكبد وقوانص الحمام وشوربة
وبالف صحه وعافيه
الليمون بيمنع ظهور اي زفاره مع انه مش زفر طبعا لانه متنظف كويس
هانزل لحضرتك في التعليق طريقة تنظيف الحمام

الليمون بيحمر الطيور سريعا ويجعلها تقرمش من بره وطريه من جوه
اتمني يعجب حضراتكم وتجربوه
وبالف صحه وعافيه
رز الحمام 

المكونات
رز بصل مخرط كبد وقوانص الحمام سمنه شوربة حمام
التوابل
بهار لحم فلفل اسود شعرة قرفه جنزبيل بودر ملح
الطريقه
في اناء صفري بصل مخرط وضيفي الكبد والقوانص
تتشمع وتبدأ تغلي ضيفي فلفل اسود وبهار لحم ونصف ملعقة كبيره خلاص
وشعرة قرفه وجنزبيل بودر وهدي النار جدا
اتركيها تستوي ويتكرمل البصل


في اناء مناسب لكمية الرز صفري بصله في سمنه وتدخل في الاحمرار
ضيفي شوربة حمام مناسبه لكمية الرز
تغلي ويخرج لون البصل في الشوربه وضيفي التوابل
انزلي بالرز المغسول وسوي الرز عادي
وبعد السوى ضيفي جزء من الكبد والقوانص
احتفظي بجزء لتزيين الرز بعد الغرف
قلبي الرز كويس واطفي النار

قدمي الرز وزينيه بالكبد والقوانص
وممكن تغرفي الرز في اناء واسع وحوله الحمام




وبالف صحه وعافيه

أحبكم في الله

0 comments

إرسال تعليق